HATAW! D'yaryo ng Bayan hatawtabloid.com
ISANG Korean national ang pinigil sa Ninoy Aquino International Airport (NAIA) kaugnay ng nasabat na mahigit sa P7 milyong halaga ng ketamine ng Philippine National Police-Drug Enforcement Group (PNP-DEG) nitong Linggo ng gabi.
Batay sa report ni PNP-DEG Acting Director PBGen. Edwin Quilates, 6:20 ng gabi nang makompiska ng kanyang mga tauhan ang droga sa Final Security Screening Checkpoint 3, Domestic Departure Area, NAIA, Terminal 2, Pasay City at dinakip si alyas Han, 39 anyos.
Nakuha sa dayuhan ang nasa 1,430 gramo ng white crystalline na pinaniniwalaang Ketamine may Standard Drug Price na P7,150,000.
Agad dinala sa PDEA Laboratory ang illegal drugs para sa pagsusuri.
