HATAW! D'yaryo ng Bayan hatawtabloid.com
MAGALANG at hindi tutulog-tulog na pulis ang nais ng bagong talagang District Director Officer-In-Charge (DD-OIC) ng Southern Police District (SPD) na si P/Brig. Gen. Randy Ygay Arceo.
Ipinahayag ito kahapon sa opisyal na pagsasalin ng responsibilidad bilang bagong DD-OIC ng SPD kay P/Brig. Gen. Arceo na ginanap dakong 1:00 ng hapon sa SPD Headquarters Grandstand, Lawton Avenue, Fort Bonifacio, Taguig City.
Pinalitan ni General Arceo si dating SPD District Director P/Brig. Joseph Arguelles na itinalaga sa Police Regional Office 11.
Sa kanyang pahayag, tiniyak ni P/Brig. Gen. Arceo na ipatutupad niya ang displina sa hanay ng mga miyembro at personnel ng SPD mula sa opisyal hanggang sa mababang ranggo.
Ani P/ Brig Gen. Arceo, hindi lang ang pisikal na presensiya ng mga pulis kundi magalang na pulis ang kanilang makikita sa mga lansangan sa kanyang nasasakupan.
Bukod dito, ipatutupad din ni Gen. Arceo ang simulation exercise sa mga pulis na dalawang beses kada ship upang maging masigla sa oras ng kanilang duty.
Ito ay bilang pagtugon sa kautusan ni NCRPO Director P/Major Anthony Aberin para hindi makatulog o antukin sa oras ng duty ang mga pulis.
Nagbabala si Aberin sa mga pulis na ang mahuhuling natutulog sa oras ng kanilang duty sa kabila na ibinaba na ito sa walong oras ay mahaharap sa administrative case. (NIÑO ACLAN)
