Wanted sa kasong murder MWP ng Calabarzon arestado

DINAKIP ang isang lalaking nakatalang most wanted person sa regional level sa bisa ng warrant of arrest na isinilbi ng 1st Laguna PMFC at PIU nitong Linggo, 1 Hunyo, sa bayan ng Alaminos, lalawigan ng Laguna.

Sa ulat kay Laguna PPO Acting Provincial Director P/Col. Ricardo Dalmacia, kinilala ang suspek na si alyas Ruel, residente sa Los Baños, Laguna.

Sa ulat ng 1st Laguna Mobile Force Company, sa pamumuno ni P/Lt. Col. Edmar Christian Allen Tuburan, Force Commander, matapos nilang matunton ang kinaroroonan ng akusado ay agad nilang isinilbi ang warrant of arrest laban kay alyas Ruel, kasama ang Provincial Intelligence Unit dakong 10:15 ng gabi, kamakalawa sa Mulberry Cemetery, Brgy. San Juan, sa nabanggit na bayan.

Dinakip ang suspek sa bisa ng warrant of arrest mula sa Los Baños City RTC Branch 107 na pinagtibay ng lagda ni Assisting Judge Rene Natividad para sa kasong murder na walang inirekomendang piyansa at sa warrant of arrest mula Calamba City RTC Branch 36 Laguna na pinagtibay ng lagda ni Presiding Glenda Mendoza-Ramos para sa kasong paglabag sa RA 9175 (Chain Saw Act of 2002) na wala rin inirekomendang piyansa. 

Kasalukuyang nasa kustodiya ng Los Baños MPS ang arestadong akusado na agad inimpormahan ang korte na pinagmulan ng mga warrant of arrest sa pagkakaaresto. (BOY PALATINO)