Dayuhan nagpanggap na cosmetic surgeon nasakote sa QC

ARESTADO ang isang Vietnamese national na nagpanggap bilang cosmetic surgeon at nagpapatakbo ng isang aesthetic clinic sa lungsod Quezon.

Ayon sa ulat ng NBI-Organized and Transnational Crime Division (NBI-OTCD), hindi lisensiyado ang mga dayuhang doktor sa naturang clinic.

Ani Atty. Jerome Bomediano, hepe ng NBI-OTCD, gumagawa sila ng mga minor surgery sa mukha ng mga pasyente na dapat ay mga lisensiyadong doktor lamang ang gumagawa.

Nag-aalok ang klinika ng malaking diskuwento sa mga serbisyo tulad ng botox, lip at chin filler, eyelid surgery, at alar trimming.

Ayon sa NBI, delikado ito dahil hindi dumaraan sa tamang pasusuri ang mga kliyente.

Tumangging magbigay ng pahayag ang dayuhang suspek na sinampahan ng kasong illegal practice of medicine.

Paalala ng NBI sa publiko, tangkilikin lamang ang mga lehitimong clinic upang matiyak na ligtas ang mga isasagawang procedure sa katawan.