HATAW! D'yaryo ng Bayan hatawtabloid.com
MALUGOD na tinanggap ni Mayor Imelda “Mel” Aguilar sa kanyang tanggapan ang 21-anyos Filipino-Egyptian actress at beauty queen aspirant na si Binibining Dalia Varde Khattab, ang pambatong kandidata ng Las Pin̈as City sa 2025 Bb. Pilipinas, sa isinagawang courtesy visit nito upang pormal na kunin ang endoso para sa kanyang partisipasyon sa naturang beauty pageant.
Si Khattab ay naninirahan sa Las Piñas simula pa noong 2017, bitbit niya ang kanyang magandang pagkakakilanlan at kalipikasyon upang maging kinatawan ng lungsod sa nasabing kompetisyon.
Binigyang-diin ng kandidata ang kanyang personal at propesyonal na pag-unlad sa Las Piñas na ikinonsidera niyang kanyang tahanan at pundasyon ng paglalakbay bilang isang artista, estudyante, at negosyante.
Kasalukuyang sumasabak si Khattab sa masinsinang pagsasanay sa ilalim ng Philippine Beauty Camp Aces & Queens dala-dala ang mga pamumuhunan sa entertainment at business. Siya ay naging tampok na sa telebisyon at pelikula at founder ng isang international fashion pop-up brand na bumida na sa Tokyo, New York, at ibang malalaking lungsod.
Nagpasalamat ang alkalde sa pagbisita ni Khattab, sa hatid nitong inspirasyon at pag-asa upang bigyang karangalan ang Las Piñas.
Lubos na sinusuportahan ng Pamahalaang Lungsod si Khattab sa paghahanda nito sa pagsali sa isa sa mga pinakaprestihiyosong beauty pageants sa bansa. (EJ DREW)
