Sa Sta. Mesa, Maynila
Truck tumagilid driver sugatan

SUGATAN ang driver ng isang truck na may kargang construction materials nang tumagilid sa Sta. Mesa, lungsod ng Maynila, nitong Sabado ng gabi, 22 Marso.

Nabatid na galing North Luzon Expressway Connector ang truck at tumagilid ito habang lumiliko pakanan sa Ramon Magsaysay Blvd., sa nasabing lugar.

Ayon kay kay Victor Baroga ng Metropolitan Manila Development Authority (MMDA) Traffic Discipline Office, hindi overloading ang sanhi ng insidente dahil maayos na nakatali ang mga kargang plywood sa truck.

Dagdag ni Baroga, may nakakitang mabilis ang takbo ng truck at hindi nakontrol ng driver ang kaniyang pagliko dahil sa bigat ng laman ng sasakyan.

Agad nagresponde ang MMDA at tinulungang makalabas ng truck ang driver at ang kaniyang pahinante.

Isinugod sa pagamutan ang driver na may sugat sa kaniyang hita at balikat, habang ligtas at walang galos ang pahinante.

Ayon sa pahinante, galing silang Bulacan at nawalan ng preno ang truck habang lumiliko sila.

Dinala ang truck sa Manila District Traffic Enforcement Unit (MDTEU) pasado 1:00 ng madaling araw para sa kaukulang dokumentasyon.

Iniimbestigahan ng MDTEU kung may pinsalang naidulot ang insidente upang matukoy ang kaukulang kasong isasampa laban sa driver.