HATAW! D'yaryo ng Bayan hatawtabloid.com
MATAGUMPAY na naaresto ng mga awtoridad ang tatlong most wanted persons sa bayan ng Obando, lalawigan ng Bulacan, nitong Huwebes, 20 Marso.
Sa pinaigting na operasyon laban sa mga wanted persons, iniulat kay P/Col. Satur Ediong, provincial director ng Bulacan PPO, nakatala ang mga naaresto bilang most wanted persons sa Municipal Level ng Obando MPS.
Magkakasunod na nadakip ng tracker team ng Obando MPS ang No. 2, No. 3, at No. 4 most wanted persons sa magkakahiwalay na operasyon.
Unang nadakip ang isang 26-anyos lalaking nakatalang No. 2 MWP para sa kasong Frustrated Murder sa Brgy. Paliwas, Obando.
Sumunod na naaresto ang isang 24-anyos lalaking nakatalang No. 3 MWP para sa kasong Frustrated Murder sa kaniyang pinagtataguan sa Brgy. Binuangan.
Samantala, nakorener ang 23-anyos lalaking nakatalang No. 4 MWP para sa kasong Frustrated Murder sa Brgy. Polo, sa lungsod ng Valenzuela.
Kasalukuyang nasa custodial facility ng Obando MPS ang mga suspek habang hinihintay ang tamang disposisyon para sa kanila. (MICKA BAUTISTA)
