Sinugod ng mga nag-iinuman
Lalaki sa Laguna patay sa saksak

BINAWIAN ng buhay ang isang lalaki matapos sugurin at pagsasaksakin ng tatlong nakainom na mga suspek sa bayan ng Paete, lalawigan ng Laguna, nitong Linggo ng gabi, 26 Enero.

Sa ulat ni P/Maj. Laurence Aboac, hepe ng Paete MPS kay Laguna PPO Provincial Director P/Col. Ricardo Dalmacia, nabatid na naganap ang insidente dakong 7:00 ng gabi kamakalawa sa T. Valdellon St., Brgy. 7 Bagumbayan, sa nabanggit na bayan.

Sa imbestigasyon, sinugod ang biktimang kinilalang si Romeo Madrigal saka pinagtulungang pagsasaksakin ng mga suspek na kinilalang sina alyas Zoilo, alyas Bobby, at alyas Ramil.

Isinugod ang biktima sa General J. Cailles Memorial District Hospital, sa bayan ng Pakil kung saan siya binawian ng buhay, habang tumakas ang mga suspek matapos ang insidente.

Dahil dito, nagtungo ang asawa ng biktimang kinilalang si Carmelita Madrigal sa pulisya upang isuplong ang krimen para agad magsagawa ng follow-up operations upang madakip ang mga suspek.

Nasakote ang mga suspek na sina alyas Ramir at alyas Zoilo na nasa kustodiya ng Paete MPS para sa kaukulang disposisyon.

Samantala, patuloy ang pagtugis sa suspek na si alyas Bobby. (BOY PALATINO)