HATAW! D'yaryo ng Bayan hatawtabloid.com
NINANAKAWAN ng tatlong lalaking nagpakilalang empleyado ng provincial government ng Laguna ang isang bahay at tinangay ang ilang personal na gamit kabilang ang mga alahas na nagkakahalaga ng P10 milyon sa Brgy. Caingin, lungsod ng Sta. Rosa, lalawigan ng Laguna, nitong Lunes ng umaga, 20 Enero.
Kinilala ang mga biktimang sina Shiela, 36, at Johcel, 27, kapwa self- employed, na nagsumbong sa mga awtoridad na tatlong hindi kilalang lalaki ang nagpanggap na mga empleyado ng kapitolyo ang dumating sa kanilang bahay para sa census survey dakong 11:50 ng umaga kamakalawa.
Nang papasukin ang mga suspek, nagdeklara sila ng holdap at tinutukan ng baril ang mga biktima saka sinamsam ang kanilang mga gamit.
Tumakas ang mga suspek dala ang kanilang mga ninakaw patungo sa direksiyon ng Brgy. Malusak, sa parehong lungsod.
Ayon sa mga biktima, nakuha mula sa kanila ng mga suspek ang 20 piraso ng sari-saring alahas na nagkakahalaga ng P10,000,000; tatlong iPhone 16 Promax na nagkakahalaga ng P276,000; dalawang iPhone 13 na nagkakahalaga ng P70,000; isang iPhone 11 Promax na nagkakahalaga ng P15,000; tatlong iPad na nagkakahalaga ng P210,000; isang Samsung cellphone na nagkakahalaga ng P12,000; at cash na P10,000.
Patuloy na nagsasagawa ng imbestigasyon ang mga awtoridad para matunton at madakip ang mga tumakas na suspek. (BOY PALATINO)
