HATAW! D'yaryo ng Bayan hatawtabloid.com
MAYNILA – Tila ipinagbunyi ng mga netizen ang pagkakatanggal ni Ako Bicol Party-list Representative Zaldy Co bilang chairman ng House Committee on Appropriations.
Ito’y matapos ipanukala ni Senior Deputy Majority Leader Sandro Marcos na gawing bakante ang puwesto ng appropriations committee chair, na inaprobahan din ni House Speaker Martin Romualdez.
Opisyal na tinanggalan si Co ng kanyang titulo bilang tagapangulo ng komite sa muling pagbubukas ng sesyon ng Kongreso nitong Lunes, 13 Enero 2025.
Nagpahayag si Co noong Lunes at sinabing kusa niyang binakante ang kanyang posisyon para tutukan ang kalusugan, na tingin ng ilang netizens ay paraan lamang ng mambabatas upang isalba ang sarili sa kahihiyan matapos patalsikin sa puwesto.
Unang naging mainit sa paningin ng ilang personalidad si Co sa gitna ng taong 2024 dahil umano sa mga kuwestiyonableng pinaglaanan ng pondo para sa 2025 budget.
“Drama lang ‘yang nag-resign, maggamit na naman sila ng iba para makaiwas sa batikos,” sabi ng isang netizen sa Facebook.
“…bakit nagresign sa komite lang, kung talagang kalusugan niya ang dahilan dapat sa pagka-kongresman siya nag-resign, nag-resign nga ba o tinanggal, dpat nag-resign o baba na din sa pagka- speaker ‘yang si tambaloslos,” dagdag ng isang netizen.
Itinanggi ni Executive Secretary Lucas Bersamin na may kinalaman ang kasalukuyang administrasyon sa pagpapatalsik kay Co sa puwesto.
Sa mga unang buwan ng 2024, nagkasagutan din si Co at si Senator Joel Villanueva, kung kailan ipinaalala ng senador ang umano’y kuwestiyonableng track record ng congressman dahil sa pagkakadawit nito sa Pharmally scandal.
