The  Voice US Champ Sofronio Vasquez III pinahanga si PBBM

MATABIL
ni John Fontanilla

NAPABALIB ng The Voice USA Season 26 champion na si Sofronio Vasquez III ang Pangulong Bongbong Marcos nang awitan ito at ang Unang Ginang kasama ang iba pa nang mag-courtesy call noong Miyerkoles, Enero 8, 2025.

Kinanta ni Sofronio ang isa sa paboritong awitin ng Pangulo, ang  Imagine ng Beatles at ang kanyang winning song sa The Voice USA Season 26, A Million Dreams na pagkatapos kumanta ay tumayo ang Pangulo at pumalakpak.

“Pinasikat mo na naman ang Filipino. Sikat na naman tayo dahil sa ginawa mo,” pahayag ni Marcos.

Si Sofronio  ang kauna-unahang Filipino at Asyano na nanalo sa prestihiyosong singing contest sa Estados Unidos.

Siya ay bahagi ng Team Bublé, na minentor ng sikat na Canadian singer/songwriter na si Michael Bublé.

Bukod sa titulong The Voice USA Season 26 grand champion, nakapag uwi si Sofronio ng $100,000 cash prize, at record deal mula sa Universal Music Group.