HATAW! D'yaryo ng Bayan hatawtabloid.com
TATLONG miyembro ng isang pamilya mula sa Filipinas ang napaslang kabilang ang dalawang bata matapos pagsasaksakin sa Baldwin Park, California.
Inaresto ng mga awtoridad ang isang 23-anyos lalaking suspek, na pinaniniwalaang kaanak ng mga biktima.
Kinilala ng Los Angeles County Medical Examiner ang mga biktima na sina Mia Chantelle Narvaez, 8; Paul Sebastian Manangan, 16; at Rona Nate, 44.
Sa ulat, nabatid na malalang saksak sa itaas na bahagi ng katawan ng tatlong biktima ang sanhi ng kanilang kamatayan.
Ayon sa Los Angeles County Sheriff’s Department, nakatanggap ng disturbance call ang Baldwin Park police sa Bogart Avenue noong gabi ng 26 Disyembre.
Napaulat na isang batang babae ang sumisigaw at lumabas ng kanilang bahay para magpatawag sa 911 dahil sinaksak ng kanyang ‘kuya’ ang kanilang ina.
Tinangkang tumakas ng suspek sakay ng sasakyan ngunit nasukol siya ng mga awtoridad.
Hindi inihayag ng mga awtoridad ang relasyon ng suspek at ng mga biktima, pero kinompirma ng mga imbestigador na nakatira ang suspek sa bahay ng mga biktima.
