Pinay sa Kuwait nakapatay ng bata
Alagang paslit inilagay sa washing machine

ISANG babaeng overseas Filipino worker (OFW) ang iniulat na nakapatay ng alagang paslit nang ipasok sa loob ng washing machine ang bata.

               Kasalukuyang nasa kustodiya ng pulisya ang OFW na umamin sa nasabing krimen.

Kaugnay nito, nagpahayag ng labis na pagkabahala ang pamunuan ng Department of Migrant Workers (DMW) sa kaso ng nasabing Pinay.

Nagpaabot ng pakikiramay ang ahensiya sa pamilya ng biktima at tiniyak na makikipagtulungan sa mga awtoridad sa isasagawang imbestigasyon.

“We convey our sincere condolences to the child’s family and the Kuwaiti government,” anang DMW.

Naniniwala ang DMW na ang naturang trahedya ay ‘isolated’ at hindi kumakatawan sa ugali ng mga Pinoy at OFWs, na kilala sa kanilang pagiging maalaga, propesyonal, at dedikado sa trabaho.

Batay sa ulat, narinig umano ng mga magulang ng batang lalaki ang palahaw nito kaya’t kaagad itong sinaklolohan. Dinala sa pagamutan ang biktima ngunit namatay rin.

Umamin sa krimen ang OFW, na ngayon ay hawak na ng mga pulis.