HATAW! D'yaryo ng Bayan hatawtabloid.com
ARESTADO ng mga awtoridad ang isang negosyanteng nakikipagkalakalan ng mga alahas para sa kasong online libel sa lungsod ng Dasmariñas, lalawigan ng Cavite nitong Lunes, 1 Hulyo.
Kinilala ang suspek na si Anmer Demafeliz, alyas Anmer, residente sa lungsod ng Makati, na sinilbihan ng warrant of arrest para sa siyam na bilang ng kasong paglabag sa RA 10175 o online libel na inisyu ng Sta. Rosa City, Laguna RTC.
Samantala, kasalukuyang tinutugis ng mga tauhan ng National Bureau of Investigation (NBI) at Manila Police District (MPD) ang kanyang dalawang kasabuwat na kinilalang sina Sheryll Villanueva, alyas Shaye Re Yil; at Kimberly Ann Santos, alyas Mskim Santos, kapwa naninirahan sa lungsod ng Makati, na nananatiling nakalalaya.
May kasong apat na bilang ng online libel si Villanueva habang si Santos ay kinasuhan ng 11 bilang ng online libel sa City Prosecutor’s Office ng lungsod ng Sta. Rosa, sa lalawigan ng Laguna.
Inilabas ng korte ang warrant of arrest na may inirekomendang piyansang tig-P10,000 laban kay Demafeliz at dalawa babaeng itinurong kasabuwat.
Kinilala ang biktimang si alyas Ninang na nagreklamo sa mga awtoridad ng cyber bullying, pambabastos at paninirang-puri sa mga larawan na may kasamang pagbabanta. (BOY PALATINO)
