2 kelot sa Makati nam-bully arestado sa boga at bala

DALAWANG lalaki ang dinakip na sinabing nagbanta sa buhay ng isang kapuwa nila residente sa Makati City habang may hawak na baril, kahapon ng madaling araw, Linggo, 30 Hunyo 2024.

Kinilala ang mga suspek na sina alyas Aidzel, 22 anyos; at alyas Marc, 20 anyos, residente rin sa Makati City.

Inaresto dakong 3:10 am kahapon sa panulukan ng Salamanca at Eduque streets ang dalawang suspek.

Base sa ulat ng Poblacion Police Sub-station, idinulog ng isang lalaki ang ginawang pagbabanta ng dalawang suspek nang walang dahilan habang nagpapakita pa ng baril.

Nang respondehan ang lugar, nadatnan ang mga suspek na magkasama habang may hawak na baril ang isa.

Nasamsam ang kalibre .38 baril, may serial number 775357, kargado ng 6 bala.

Nai-turnover ng sub-station ang dalawang suspek sa Investigation and Detective Management Section (IDMS) ng Makati City Police Station para sa mas masusing imbestigasyon at sa kasong ihahain laban sa kanila.  (NIÑO ACLAN)