Wanted sa kasong Murder
MISTER HOYO SA KANKALOO

ARESTADO ang isang mister na wanted sa kaso ng pagpatay sa isinagawang manhunt operation sa Caloocan City, kamakalawa ng gabi.

Ayon kay Caloocan City police chief P/Col. Ruben Lacuesta, nakatanggap ng impormasyon ang mga tauhan ng Police Sub-Station 8 hinggil sa pinagtataguang lugar ng 44-anyos wanted kaya nagsagawa sila ng validation.

Nang positibo ang report, agad nagsagawa ang mga tauhan ng SS8 ng manhunt operation na nagresulta sa pagkakaaresto sa suspek na itinago sa pangalang Archie, dakong 10:15 pm sa Villa Campo, Gemini St., Brgy. 165 ng nasabing lungsod.

Binitbit ng pulisya ang akusado sa bisa ng warrant of arrest na inisyu ni Presiding Judge Rose Sharon Santiago Cordero-Abila ng Regional Trial Court Branch 129, Caloocan City noong 18 Abril 2024, para sa kasong Murder.

Pansamantalang nakapiit ang akusado sa SS8 ng Caloocan police habang hinihintay ang pagpapalabas ng commitment order mula sa korte. (ROMMEL SALES)