No. 4 most wanted person ng NPD
DRIVER ARESTADO SA RIZAL

TIMBOG ang isang lalaking No. 4 most wanted person ng Northern Police District (NPD) sa isinagawang manhunt operation ng mga tauhan ng Valenzuela City police sa Teresa, Rizal, kamakalawa ng hapon.

Sa kanyang ulat kay NPD Director P/BGen. Rizalito Gapas, sinabi ni Valenzuela City police chief P/Col. Salvador Destura, Jr., nakatanggap ng impormasyon ang Station Intelligence Section (SIS) hinggil sa kinaroroonan ng akusadong si alyas Joemark, 28 anyos, driver.

Bumuo ng team ang SIS sa pangunguna ni P/Major Randy Llanderal saka ikinasa ang manhunt operation na nagresulta sa pagkakaaresto sa akusado dakong 1:00 pm sa Carissa Homes East 2, Barangay Dalig, Teresa, Rizal.

Ayon kay Major Llanderal, inaresto nila ang akusado sa bisa ng warrant of arrest na inisyu ni Presiding Judge Evangeline S. Mendoza-Francisco ng Regional Trial Court Branch 270, Valenzuela City noong 17 Setyembre 2021, sa kasong Rape (RPC Art. 266-A) in rel. to R.A. 7610 – Child Abuse Law (2 counts).

Pansamantalang nakapiit ang akusado sa custodial facility unit ng Valenzuela police habang hinihintay ang pagpapalabas ng commitment order ng korte. (ROMMEL SALES)