Cong Arjo ‘di lalabanan Major Joy sa pagka-mayor

MATABIL
ni John Fontanilla

MARIING pinabulaanan ni Sylvia Sanchez ang bali-balitang kakalabanin ng anak niyang si Quezon City District 1 Congressman Arjo Atayde si Mayor Joy Belmonte sa 2025 elections.

Ayon kay Sylvia, malaki ang utang na loob ni Arjo ka’y Mayor Joy dahil ito ang gumabay at tumulong nang magdesisyon ang panganay na anak na pasukin ang politika.

Tsika nga nito sa isang interview, “Si Mayor Joy ang tumulong sa kanya, ang nagpapasok sa kanya rito (politika) at naging mentor niya. Sinabi niya talaga sa akin, ‘Hindi ko lalabanan si Mayor Joy Belmonte. ‘Yan ang nanay ko rito (Quezon City)’.”

At kahit nga silang mag-asawa(Art Atayde) ay ‘di sasang-ayon na tumakbo bilang mayor ng QC si Arjo at kalabanin si Mayor Joy.

“Hindi lalaban si Arjo kay Joy Belmonte. Imposible ‘yun. Una, aayawan ni Arjo, pangalawa aayawan naming mag-asawa. Mahal ni Mayor Joy si Arjo.”

Ang sigurado ay muling tatakbo sa pagka-Kongresista ng Distrito 1 ng Quezon City si Arjo at hindi sa pagiging mayor.