HATAW! D'yaryo ng Bayan hatawtabloid.com
BAKAS sa mukha ni Lola Erlinda Menor, 75, ang saya matapos makilahok sa #SeniorDigizen learning session na pinangunahan ng Globe kamakailan, na natuto siya tungkol sa digital technology.
“Sa edad kong ito, very thankful ako. Ako ay 75 years old ngayon, still moving at masigla. At ayun nga, nadagdagan ang knowledge ko sa digital na mga impormasyon. Napakagandang bagay para sa amin ito. Ito ay malaking tulong sa amin. At hindi lang sa akin. Kumbaga, maibabahagi ko ito sa aking mga ka-senior na hindi rin alam ng iba. Mabibigyan ko rin sila ng knowledge na nalaman natin dito sa programang ito,” ani Menor.
Isa si Menor sa 200 senior citizens mula Metro Manila na nakilahok sa unang Teach Me How to Digi Learning Session ng Globe noong January 25, 2024, na layong tulungan ang mga lolo at lola sa bansa na makasabay sa digitalization journey.
Sa learning session na ito, tinuruan ang mga senior kung paano gumamit ng smartphone, GMail, GCash, at KonsultaMD, na magagamit nila para mapagaan ang araw-araw na pamumuhay.
“Napakaganda at napakalinaw ng mga sinabi. Nakaka-impress. At saka para sa mga senior, napakalaking bagay itong programa na ito dahil alam niyo naman mga senior, may mga senior moments. Ngayon, napapadali natin mga bagay na mahirap gawin. Dahil digital na nga, mabilis na ngayon ‘yung pagbayad sa bills, pag-communicate sa mga doktor,’di ba? Tapos makipag-communicate sa mga kaibigan. Napakalaking bagay para sa amin ngayon, dahil dito sa Senior Digizen [campaign] ng Globe,” ani Menor.
Ayon naman kay Enrique dela Paz, 64, isang retired seaman mula Pasig City, mahalaga ang digital skills para mas mapadali ang mga gawain.
“Masaya na at least naiimbitahan kami na matuto maski na nasa ganitong edad na. Napapaabot para sa amin ang teknolohiya. Masaya!” aniya.
Para naman kay Eulenia Jerez, 71, masayang matuto ng digital skills dahil kadalasan ay hirap ang mga senior na sumabay sa makabagong teknolohiya.
“Siyempre ‘yung mundo ng digital, mahirap para sa amin ‘yan, dahil kami ay ‘di nagsimula riyan. Ang magpaturo ay mahirap din. Pero gusto namin ma-enjoy. Alam mo ‘yung tipong sila nga marunong, tapos ako hindi. Nagsisikap akong mag-aral kapag ganon dahil alam kong need ng panahon,” ani Jerez.
Aniya, ang digital skills ay makatutulong sa kanya para gampanan ang tungkulin bilang isang community volunteer: “Doon ako masaya, basta marami akong napaglilingkuran na ibang tao. Wala akong itinatago sa puso ko na kapalit, basta makapag-serve ako sa kanila. ‘Yan ang importante para sakin.”
Ang #SeniorDigizen campaign ay bahagi ng pagtutulak ng Globe sa digital inclusion. Layunin nitong tulungan ang seniors na alisin ang takot, pangamba, at maling akala tungkol sa digital technology, at para rin protektahan sila sa mga peligro online.
“Sa panahong ito, ang digital skills ay hindi na maaaring isawalang bahala. At para sa Globe, kailangan lahat ay kasabay sa digitalization dahil maraming benepisyo ang paggamit ng digital technology, lalo na sa seniors,” ayon kay Yoly Crisanto, Chief Sustainability and Corporate Communications Officer ng Globe Group.
