Wanted ng NPD nasakote sa caloocan

ARESTADO ang isang lalaki na nakatala bilang top 7 most wanted person sa Northern Police District (NPD) sa isinagawang manhunt operation ng pulisya sa Caloocan City, kamakalawa ng gabi.

Ayon kay Caloocan police City chief P/Col. Ruben Lacuesta, nakatanggap ng impormasyon ang mga tauhan ng IDMS, Warrant and Subpoena Section (WSS) hinggil sa kinaroroonan ng akusadong si alyas “Rudy” na wanted sa kasong pagpatay.

Bumuo ng team ang IDMS-WSS sa pangunguna ni PSSg Michael Agub bago nakipag-ugnayan sa Bagong Barrio Police Sub-Station 5 sa pangunguna ni P/Cpt. Paul Normal Larugal saka nagsagawa ng joint manhunt operation kontra wanted persons na nagresulta sa pagkakaaresto sa akusado dakong 10:10 ng gabi sa Pangako St., Barangay 151.

Ani Col. Lacuesta, dinakip ang akusado sa bisa ng warrant of arrest na inisyu ni Caloocan City Regional Trial Court Branch 129 Judge Rose Sharon Santiago Cordero-Abila noong December 19, 2023, para sa kasong Murder.

Pansamantalang nakapiit ang akusado sa IDMS-WSS ng Caloocan police habang hinihintay ang pagpapalabas ng commitment order mula sa korte. (ROMMEL SALES)