Sa pagtiyak ng mapayapang Kapaskuhan
2 TULAK, 4 PUGANTE INILAGAY SA REHAS NG HUSTISYA

SA patuloy na operasyon ng pulisya sa Bulacan ay sunod-sunod na inaresto ang dalawang (2) tulak at apat (4) na pugante sa lalawigan kamakalawa, Disyembre 20 at hanggang kahapon ng umaga.

Ang dalawang (2) tulak ay naaresto sa ikinasang buy-bust operation ng Meycauayan City Municipal Police Station {CPS} kung saan nakumpiska sa kanila ang anim (6) na sachet ng hinihinalang shabu na may Standard Drug Price (SDP) na Php 8,840.00 at marked money. 

Dinala sa Bulacan Provincial Forensic Unit (PFU) ang mga nakumpiskang ebidensya para sa kaukulang pagsusuri, habang reklamong kriminal sa  paglabag sa R.A. 9165 ang inihahanda na laban sa mga suspek para sa pagsasampa sa korte. 

Samantala, inaresto ng tracker team ng San Jose del Monte, Obando, at Hagonoy C/MPS ang apat (4) na wanted na indibiduwal dahil sa mga krimeng estafa at acts of lasciviousness. 

Ang lahat ng naarestong akusado ay kasalukuyang nasa kustodiya ng arresting unit o istasyon para sa kaukulang disposisyon. 

Kaugnay nito ay tiniyak ni P/Lt.Colonel Jacquiline P. Puapo, officer-in-charge ng Bulacan PPO ang mahigpit na pagpapatupad ng mga hakbang sa pag-iwas laban sa krimen, pagsubaybay sa mga indibidwal na hinahanap ng batas at tiniyak din ang kanilang pangamba upang dalhin sila sa likod ng rehas ng hustisya.

Ito aniya ay nakakamit sa pamamagitan ng aktibong pakikilahok ng komunidad, sa pagpapaunlad ng isang ligtas at mapayapang panahon ng Kapaskuhan. (MICKA BAUTISTA)