Buy-bust sa Kankaloo
P68-K SHABU HULI SA TULAK

BAGSAK sa selda ang isang hinihinalang tulak ng ilegal na droga nang mabuking ang P68,000 halaga ng shabu nang masakote sa isinagawang buybust operation ng pulisya sa Caloocan City, kahapon ng madaling araw.

Kinilala ni Caloocan City police chief P/Col. Ruben Lacuesta ang naarestong suspek na si alyas Ronel, 27 anyos, residente sa Brgy. 49 ng nasabing lungsod.

Sa ulat ni Col. Lacuesta kay Northern Police District (NPD) Director P/BGen. Rizalito Gapas, dakong 1:17 am nang magsagawa ang mga operatiba ng Station Drug Enforcement Unit (SDEU) sa pangunguna ni P/Cpt. Emmanuel Aldana ng buybust operation sa Doña Consuelo St., Brgy. 19 matapos makatanggap ng impormasyon hinggil sa pagbebenta ng shabu ng suspek.

Isang pulis na nagpanggap na buyer ang nagawang makaiskor sa suspek ng P6,500 halaga ng droga at nang tanggapin ang marked money mula sa operatiba kapalit ng isang sachet ng shabu ay agad siyang dinamba ng mga awtoridad.

Nakompiska sa suspek ang nasa 10 gramo ng hinihinalang shabu, may standard drug price value na P68,000 at buybust money na isang tunay na P500 bill at anim na pirasong P1,000 boodle money.

Mahaharap ang suspek sa kasong paglabag sa RA 9165 o Comprehensive Dangerous Drug Act of 2002. (ROMMEL SALES)