HATAW! D'yaryo ng Bayan hatawtabloid.com
ARESTADO ang isang lalaking pinaniniwalaang ‘big time’ na tulak ng droga at ang kanyang tatlong kasabuwat na nakompiskahan ng tinatayang P3,400,000 halaga ng hinihinalang shabu matapos ikasa ng mga awtoridad ang drug entrapment operation sa open parking area ng isang mall sa lungsod ng Dasmariñas, lalawigan ng Cavite, nitong Martes, 7 Nobyembre.
Kinilala ang mga suspek na sina Hedwig Ramos, alyas Jake, 40 anyos, residente sa Pampanga; Ryan Comerciante alyas Victor, 43 anyos, residente sa Sta. Maria, Bulacan; Mark Angelo Marasigan, 36 anyos, residente sa Biñan, Laguna; at Lester Ramos, 37 anyos, residente sa lungsod ng Pasay.
Ayon sa operating team, si Ramos, na pangunahing target ng operasyon, ay sangkot sa bultuhang pamamahagi ng shabu sa lungsod ng San Fernando at mga kalapit na bayan sa Pampanga at maging sa Bulacan kung saan ang isa sa naaresto ay residente sa lalawigan.
“We were able to secure a drug deal with Ramos for the purchase of 500 grams of shabu and agreed to meet in San Fernando, Pampanga. Inaresto sila sa isang mall parking lot sa Dasmariñas City,” dagdag ng team leader.
Narekober ang limang nakabuhol na transparent plastic bag na naglalaman ng halos 500 gramo ng hinihinalang shabu na nagkakahalaga ng P3,400,000; at marked money na ginamit sa operasyong isinagawa ng pinagsamang elemento ng PDEA Pampanga Provincial Office at PDEA Calabarzon.
Samantala, inihahanda na ang kasong paglabag sa Section 5 (sale of dangerous drugs) kaugnay ng Section 26B (conspiracy to sell) ng RA 9165 o Comprehensive Dangerous Drugs Act of 2002 sa isasampa sa korte laban sa mga suspek. (MICKA BAUTISTA)
