CHILD Haus: Ipinagdiwang ang ika-21 taon ng paglilingkod sa mga batang may kanser

Sa SM Mall of Asia Music Hall ipinagdiwang ng CHILD Haus ang ika-21 anibersaryo nito noong nakaraang Oktubre 29, 2023. Ang CHILD Haus ay isang institusyon na itinatag ni ‘Mader’ Ricky Reyes upang maging kanlungan ng pag-asa para sa mga kabataang tinamaan ng sakit na kanser. Sa buong kasaysayan ng CHILD Haus, isa sa mga patuloy at pangunahing sumusuporta ng institusyong ito ay ang pamilya Sy—si Henry ‘Tatang’ Sy, Sr. sa mga unang taon, at sa kalaunan, ang SM Prime Holdings Inc. Chairman ng Executive Committee na si Hans Sy na ang nagpapatuloy ng tradisyong itinatag ng kanyang ama.

Pinangunahan ni Mr. Sy at ‘Mader’ Ricky Reyes ang programa, kasama ang ilang mga indibidwal at kumpanya na naging katuwang at nagbigay tulong sa CHILD Haus sa loob ng mga nakaraang taon. Kasama rin ang mga kabataang kinupkop ng CHILD Haus na ngayon ay tinatawag na itong kanilang tahanan. Naroroon din ang mga media na nagpapatunay kung paanong ang institusyong gaya ng CHILD Haus ay nakagawa ng malaking pagkakaiba at tila naging daan upang matugunan ang mga panalangin ng mga kabataan at ng kanilang mga magulang.

Tatlong natatanging kuwento ng mga bata mula sa CHILD Haus ang naging tampok sa isang video presentation, bilang bahagi ng programa. Ito ay ang mga kuwento nina Aya, Laura, at Jessa na ibinahagi ang kanilang mga mensahe ng pag-asa at pagbabago sa kanilang buhay, sa tulong ng CHILD Haus. Naging saksi ang mga batikang media sa matagumpay na pagpaparating ng mga mensahe ng pagtibay ng loob na itinampok sa mga video, na pinatunayan ng mga luha ng kasiyahan at simoy ng pag-asa na dumaloy sa lahat ng mga dumalo sa pagdiriwang.

Pagkatapos ng panimulang pagbati ni ‘Mader’ Ricky, si Mr. Sy ay pinangunahan ang pamamahagi ng mga plaque, bilang pagpapasalamat sa mga kaibigan ng CHILD Haus, na buong pusong nagkaloob ng tulong. Sa pamamagitan ng mga kaloob na ito, naging posible ang layunin ng CHILD Haus na makapagbigay ng ibayong pag-asa sa mga batang kinakalinga ng kanilang organisasyon.

Ang mga batang may kanser na kinikupkop ng CHILD Haus ay pinagkakalooban ng tahanan, pagkain, at atensiyon. Sa kasalukuyan, may dalawang CHILD Haus na mga lokasyon—isa sa Maynila, sa pakikipagtulungan kasama ang Philippine General Hospital (PGH), at isa sa Quezon City. Ang mga bata at isa sa kanilang mga magulang ay maaaring manatili sa CHILD Haus hanggang sa mawala ang kanilang kanser o matapos ang kanilang mga medikal na pangangailangan, samantalang ang mga sanggol naman ay maaaring kasama ang parehong mga magulang.

Isa sa mga matagal nang tagasuporta at regular na bumibisita sa CHILD Haus ay ang singer na si Karylle. Naghandog siya ng isang awiting isinulat ng kanyang asawang si Yael Yuzon, isa ring singer. Ang awiting ito ay nagbigay inspirasyon sa mga bata at mga bisita sa pagdiriwang. Bukod dito, naghandog din ang anak na babae ni ‘Mader’ Ricky ng isang ‘reworded’ na bersyon ng kantang ‘Handog’ ni Florante, na inakma sa damdamin ng mga bata sa CHILD Haus. Pinag-aralan ng mga bata ang dalawang kantang ito upang iparating ang kanilang labis na pasasalamat sa mga kaibigan na patuloy na tumutulong para maisakatuparan ang misyon ng CHILD Haus.

Sa huli, kinilala nina ‘Mader’ Ricky at si Mr. Sy ang kahalagahan ng pagdiriwang na ito—ang ika-21 taon ng patuloy na pagmamalasakit, katatagan ng loob, at buong-pusong tulong sa ating kapwa.

Para malaman pa ang tungkol sa mga nakaka-inspire na kwento at kaganapan sa SM, bisitahin ang www.smsupermalls.com o sundan ang @smsupermalls sa social media.