HATAW! D'yaryo ng Bayan hatawtabloid.com
NASA higit isang libong “flying voters” sa Barangay 97 sa lungsod ng Pasay ang inisyuhan ng warrant of arrest.
Minomonitor ng Commission on Elections (COMELEC) at Philippine National Police (PNP) ang posibilidad na pagsulpot ng mahigit 1,000 na “flying voters” sa Barangay 97 sa lungsod sa kasagsagan ng Barangay at Sangguniang Kabataan Elections (BSKE).
Ito ay matapos na maglabas ng warrant of arrest ang Pasay City Regional Trial Court (RTC) laban sa mga tinukoy na indibiduwal.
Ipinakita ni Christian Barcenas,isang Comelec Poll watcher sa Brgy. 97 at isa rin witness sa korte para sa criminal charges na isinampa sa mga flying voters, ang dokumento ng warrant of arrest na inisyu ng Pasay RTC Branches 114, 115, at 117.
Ayon dito, natukoy na pawang mga sa residente ng Grace Park, palibot ng sementeryo sa Brgy. 120 sa Caloocan City ang mga flying voters.
Sabi pa ni Barcenas na isang “alyas Manny” sa Caloocan ang contact person at recruiter ng mga sinasabing flying voters at ginamit na address sa lungsod ng Pasay ang area sa hagdanan ng LRT.
Aniya, posibleng bumoto sa kanilang polling precinct ang mga natukoy na flying voters subalit agad silang aarestuhin pagkatapos bumoto sa bisa ng citizen arrest kung walang mga pulis.
Dagdag pa nito na isang babae ang nagtangkang bumoto gamit ang isang pangalan na matagal nang namatay kung saan dali dali itong nakaalis.
Sa dokumento nakasaad na may P50,000 na nakalaang piyansa sa bawat indibiduwal na mahuhuling flying voters na inisyuhan ng warrant. (GINA GARCIA)
