Miyembro ng CPP-NPA sa Bulacan sumuko

Boluntaryong sumuko sa tropa ng pamahalaan ang isang miyembro ng Communist Party of the Philippines-New People’s Army (CPP-NPA) sa Malolos City, Bulacan kamakalawa.

Batay sa ulat kay PColonel Relly B. Arnedo, provincial director ng Bulacan Police Provincial Office (BULPPO), ang sumuko ay kinilala bilang si Alyas Ka Ome, 32, mangingisda, miyembro ng Rebolusyonaryong Hukbong Bayan (RHB), na kumikilos sa coastal areas ng Bulacan, Bataan, Pampanga, at Zambales. 

Napag-alamang siya ay nakumbinsing sumapi sa nabanggit na rebeldeng grupo sa paniniwalang reporma sa gobyerno at makamit ang pantay na karapatan at katarungang panlipunan.

Ayon sa Force Commander ng 1st Provincial Mobile Force Company (PMFC), sumuko si Alyas Ka Ome sa  Camp Alejo S Santos, Brgy. Guinhawa, Malolos, Bulacan, sa magkasanib na mga elemento ng 1st PMFC, Bulacan PIU, 2nd PMFC, 301st MC RMFB, 24th SAC, 2SAB PNP SAF, at 70IB PA.

Isinuko rin ni Alyas Ka Ome ang isang hindi lisensiyadong cal..38 revolver na walang serial number at dalawang pirasong bala.

Ang sumukong rebelde ay kasalukuyang nasa ilalim ng kustodiya ng 1st PMFC para sa imbestigasyon at custodial debriefing.{Micka Bautista}