HATAW! D'yaryo ng Bayan hatawtabloid.com
REHAS na bakal ang kinasadlakan ng isang lalaking ‘exhibitionist’ matapos makunan ng video habang nagpapakita ng ari sa 6-anyos batang babae sa Malabon City.
Kinilala ang suspek na si Cesar Ramos, 49 anyos, construction worker, residente sa Int. Pilapil, Sanciangco St., Brgy. Catmon ng nasabing siyudad.
Nahaharap ang suspek sa kasong paglabag sa R.A. 11313 o ang Safe Spaces Act na kilala bilang Bawal Bastos Law at R.A. 7610 o ang Special Protection Against Child Abuse, Exploitation and Discrimination.
Sa isinumiteng ulat ni P/SSgt. Mary June Belza ng Women and Children’s Protection Desk (WCPD) kay Malabon police chief P/Col. Jay Baybayan, nasa loob ng tirahan ang testigong si Glenda Tenorio, 38 anyos, sa Pilapil Ext., Sanciangco St., dakong 2:46 pm nang mapansin nito ang suspek na nakatingin sa batang biktima at tila may pagnanasa.
Dahil dito, kinunan ni Tenorio ng video mula sa hawak niyang cellular phone, ang suspek at nagulat siya nang ilabas ng lalaki at ipakita sa bata ang kanyang ari na huling-huli sa kuha ng camera.
Nang ipakita ni Tenorio sa ina ng bata ang video, humingi sila na tulong kina P/Cpl. Rochester Bocyag, P/Cpl. Mark Jayson Pavia, at P/Cpl. John Michael Tigbawan ng Malabon Police Sub-Station 4 na nagresulta sa pagkakaaresto sa suspek na hindi na nakatanggi matapos ipakita sa kanya ang video na kuha sa cellphone ng kanyang kapitbahay. (ROMMEL SALES)
