HATAW! D'yaryo ng Bayan hatawtabloid.com
Labing-isang indibiduwal na may mga paglabag sa batas ang arestado sa magkakasunod na operasyon ng pulisya sa Bulacan kamakalawa.
Sa magkakahiwalay na buy-bust operation na ikinasa ng Station Drug Enforcement Unit (SDEU) ng San Jose Del Monte at Plaridel C/MPS ay tatlong suspek sa kalakalan ng droga ang arestado.
Kinilala ang mga ito na sina Kelvin Reyes, Elpedio Sumile, at Mary Jane Garcia na arestado sa pagbebenta ng iligal na droga.
Nakumpiska sa kanila ang sampung pakete ng plastic ng shabu na may Standard Drug Price (SDP) na Php 54,000.00, assorted drug paraphernalia, at buy-bust money.
Ang mga nakumpiskang ebidensiya ay dinala sa Bulacan Provincial Forensic Unit (PFU) para sa pagsusuri samantalang kasong kriminal na paglabag sa R.A. 9165 ang isasampa sa hukuman laban sa mga suspek.
Apat namang wanted persons ang arestado sa manhunt operations na inilatag ng tracker teams ng municipal at city police stations ng Marilao, Calumpit, San Ildefonso, at Pandi.
Kinilala ang mga ito na sina Cyrah Loi Leccio, na inaresto sa paglabag sa R.A 9003 (Ecological Solid Waste Management Act of 2000) sa Peacock St., Heritage Homes, Marilao, Bulacan; Rodell Reyes, arestado para sa Acts of Lasciviousness kaugnay sa R.A. 7610 (3 Counts, sa Brgy Frances, Calumpit, Bulacan; Roi Viudez, arestado para sa Reckless Imprudence Resulting in Damage to Property sa Sitio Pag-asa Brgy. Sapang Putik, San Ildefonso, Bulacan; at Rafael Uvas sa paglabag sa BP 22 sa Brgy. San Roque, Pandi, Bulacan
Lahat ng naarestong akusado ay kasalukuyang nasa ilalim ng kustodiya ng kani-kanilang arresting unit/station para sa nararapat na disposisyon.
Samantala, sa operasyon naman laban sa illegal gambling, ang mga tauhan ng Sta. Maria MPS ay naaresto ang tatlong indibiduwal, kinilalang sina Teodoro Castillo, Michael Padayao; at Ronnie Hernandez.
Naaktuhan sila sa pagsusugal ng cara y cruz at nakumpiska sa kanila ang tatlong one-peso coins na pangara at bet money sa iba’t-ibang denominasyon.
Ayon kay PColonel Relly B. Arnedo, provincial director ng Bulacan PNP, ang sunod-sunod na operasyon ng Bulacan police ay bilang pagtalima sa marching order ng Chief, PNP, na paigtingin, palakasin at pagtuunan ang kampanya laban sa krimen na epektibong isinasagawa sa pamumuno ng Regional Director ng PRO 3, PBGeneral Jose S. Hidalgo Jr. (MICKA BAUTISTA)
