Batilyo kritikal sa pananaksak ng magtiyuhin

KRITIKAL ang kalagayan ng isang batilyo sa fish port complex matapos kursunadahin ng magtiyuhin sa Navotas City, kamakalawa ng gabi.

Inoobserbahan sa Tondo Medical Center (TMC) ang biktimang kinilalang si Oliver Quita, 21 anyos, residente sa Yellow Bell St., Brgy. NBBS Proper, sanhi ng mga saksak sa tiyan.

Agad naaresto ng mga tauhan ng Navotas Police sa hot pursuit operation ang isa sa mga suspek na si Charlie Desabille, 44 anyos, kapwa batilyo; habang tinutugis pa ang kanyang pamangkin na si Jonathan Desabille, alyas Athan, nasa hustong gulang, kapwa residente sa Champaca St., Brgy. NBBS Proper.

Sa report ni P/SSgt. Edison Mata kay Navotas police chief P/Col. Allan Umipig, dakong 8:20 pm nang maganap ang pananaksak sa biktima sa harap ng isang tindahan sa Road 10 kanto ng Yellow Bell St., sa nasabing barangay.

Nabatid, habang nakaupo ang biktima habang naghihintay ng inorder niyang pagkain, dumating ang mga suspek na kapwa lango sa alak.

Sa pahayag ng 20-anyos babaeng saksi kay P/SSgt. Mata, narinig niya na sinabihan ng isa sa mga suspek ang biktima na “Ikaw matapang ka ba? Papalag ka ba?” at pagkatapos ay inudyukan ang pamangkin na ‘saksakin muna pamangkin’ kaya agad naglabas ng patalim si Athan saka inundayan ng saksak sa kaliwang bahagi ng tiyan si Quita.

Matapos saksakin, mabilis na tumakas ang mga suspek sa hindi matukoy na direksiyon habang isinugod ang biktima sa nasabing pagamutan. (ROMMEL SALES)