Nene patay sa bungkos na buko ng Niyog

ISANG 7-anyos batang babae ang namatay matapos matamaan ng isang bungkos ng buko mula sa puno ng niyog sa liblib na barangay ng Mua-an, sa lungsod ng Kidapawan, lalawigan ng Cotabato, nitong Biyernes ng hapon, 14 Hulyo.

Kinilala ni P/Capt. Razel Enriquez, deputy police chief ng Kidapawan CPS, ang biktimang si Shikayna Aguirre, 7 anyos, nakatakdang pumasok bilang Grade 2 sa pasukan.

Nabatid na naglalaro ang bata malapit sa kanilang bahay nang maganap ang insidente.

Ayon kay Enriquez, nakiusap ang magulang ng biktima sa isang kapitbahay upang mag-ani ng mga niyog para maging kopra ngunit nahulog ang bungkos ng mga buko at tumama sa ulo ng bata.

Nagawang maisugod sa malapit na pagamutan ang biktima ngunit idineklarang dead-on-arrival ng doktor.

Samantala, kusang sumuko ang kapitbahay ng biktima na kalaunan ay pinalaya dahil sa pakikipag-ayos sa mga magulang ng batang nagpahayag na hindi na magsasampa ng reklamo laban sa kanya. ###