HATAW! D'yaryo ng Bayan hatawtabloid.com
Sa kabila nang mga naranasan na pag-ulan ng ilang araw, patuloy ang pagbaba ng antas ng tubig sa Angat Dam na nasa Norzagaray, Bulacan.
Ayon sa National Water Resources Board (NWRB), dalawang metro na lamang ang ibaba ng antas ng tubig sa naturang dam at ito ay nasa kritikal na antas na.
Ang critical level ay 180 metro at hanggang kahapon ito ay nasa 181.22 metro na pero sinabi ni NWRB executive director Sevillo David, Jr., ang pagbaba ng tubig ay hindi pa apektado ng El Nino.
Dagdag pa ni Sevillo, wala pang pagbabago sa alokasyon ng tubig mula sa Angat Dam ngunit tiyak na magbabago ito kapag bumaba na sa critical level ang antas nito.
Aniya pa na kapag nangyari ito ay mababawasan ang alokasyon ng tubig para sa irigasyon dahil ang prayoridad ay ang pangangailangan sa tubig ng Metro Manila. (MICKA BAUTISTA)
