Marco Gumabao patay na patay sa pag-Ibig

ni Allan Sancon

MATAPOS ang matagumpay na youth-oriented Viva One Original Series na The Rain in España na palabas pa sa Viva One hanggang ngayon, muli na naman silang maglalabas ng panibagong series, ang Deadly Love. Isang suspense-thriller series na pinagbibidahan ng award winning actress na si Jaclyn Jose kasama sina Louise Delos Reyes, Mccoy de Leon, Marco Gumabao at marami pang iba.

Natanong sa media launch kung may karanasan na ba ang cast members sa kanilang buhay pag-ibig na maituturing nilang deadly love.

“Oo nakaranas na ako ng deadly love, nakatatakot na kabanata sa buhay ko, deadly love talaga. But everything was gone, matagal na panahon na ang nakalipas but it was happened to me, naka-recover na ako riyan,” kuwento ni Ms. Jaclyn.

“Sa akin naman na-experienced ko rin pero hindi naman deadly para sa kin, pero alam mo ‘yung ibinigay mo ‘yung lahat, ‘yung time ko, ‘yung effort ko, pati katawan ko, joke lang. ‘Pag nagmahal kasi ako todo-todo, nagiging deadly lang siya kapag nabigo ako,” saad naman ni Mccoy.

“Sa akin naman, siguro halos kalahati ng mga press dito ay alam kung ano ang napagdaanan ng lovelife ko noon pa. Siguro hindi naman siya ‘yung super deadly pero darating sa point na parang gusto mo nang mamatay parang ganoong klaseng deadly love. Pero mahal ko naman ‘yung buhay at ang career ko kaya naka-recover naman ako at marami akong natutunan sa past experienced ko na ‘yun,” pagbabahagi ni Louise

“Sa totoo lang wala  pa naman akong toxic or deadly love relationship, swerte! Swerte ko lang na hindi umaabot sa ganoon. Pero patay na patay na love mayroon,” sabi naman ni Marco.

Magsisimula nang ipalabas ngayong July 10, 2023 sa Viva One ang kaabang-abang na suspense-thriller series na Deadly Love directed by Derick Cabrido.