Divorce sa iresponsableng tatay

Isumbong mo
kay DRAGON LADY
ni Amor Virata

Hinihikayat ni dating House Speaker at 1st District Rep. ng Davao del Norte Rep. Pantaleon “Bebot” Alvarez sa mga kasamahang mambabatas  sa Kamara na aprobahan na ang panukalang divorce sa bansa at iminungkahi na hindi na dapat magsama bilang mag-asawa ang mga partners na naglaho na ang pagmamahal sa isa’t isa dahil sa posibleng hahantong sa madalas na pag-aaway at delikadong umabot ang mainitang pagtatalo sa madugong argumento.

Si Alvarez, nagpanukala sa Kongreso ng divorce bill, ay mahigpit ang kagustuhan na maipasa sa Kamara ang nabanggit na bill, dahil marami umanong reklamo ng insidente ng VAWC na kadalasan ay pambubugbog at pangangaliwa ng mga mister sa kanilang mga misis at kadalasan mga anak ang nagpapasan ng sakripisyo sa problema ng kanilang mga magulang.

Opinyon ng mga misis na iniwanan ng mga mister, mas mainam na may diborsiyo sa Filipinas sakaling hindi na talaga puwede pang magsama ang isang mag-asawa ay mas makatutulong ito sa isang pagsasama na wala ng pagmamahalan sa loob ng tahanan.

Korek na korek ‘yan mga ‘igan, bakit ka magtitiyaga sa isang relasyon kung ang partner mo ay wala nang respeto bilang asawa.

SI EX-PRIME MINISTER CESAR E.A. VIRATA

Almost 92 turning 93 years old, malakas pa at nakapaghatid pa ng kanyang mensahe sa isinagawang reunion ng “One Virata Clan” noong nakalipas na araw ng Linggo, sa Hennara Resort sa Silang, Cavite.

Dinalohan ng mga miyembro ng VIRATA CLAN ang nasabing okasyon na nagmula sa iba’t ibang lugar maging sa ibang bansa. Hindi sa pagyayabang mga ‘igan, lolo namin si ex-Prime Minister kaya naman ang buong pamilya ko ay dumadalo sa lahat ng isinasagawang reunion ng Virata Clan.

Isa lang ang ugaling namana ko sa mga Virata, hindi mapagsamantalang tao at dedikasyon sa kanyang trabaho, ‘yan ang Virata clan.