HATAW! D'yaryo ng Bayan hatawtabloid.com
LUCENA CITY – Dalawang Turkish nationals ang nailigtas nang masunog at sumabog ang kanilang sinasakyang yate sa bayan ng Nasugbu, sa lalawigan ng Batangas nitong Biyernes, 16 Hunyo.
Sa ulat ng Batangas police nitong Sabado, 17 Hunyo, nabatid na sina Erdinc Turerer, 62 anyos, at Ergel Abdulla, 40, ay naglalayag sakay ng kanilang yate
nang hampasin ng malakas na alon sa lokasyon ng Limbones island sa Barangay Papaya dakong 3 am.
Dahil sa walang tigil na pag-uga ng yate tumapon ang nakaimbak na gasolina sa engine room na agad ‘hinalikan’ ng apoy hanggang magkaroon ng pagsabog.
Agad nakalundag palabas sa yate ang dalawang biktima bago tuluyang sumabog ang sasakyan, ayon sa pulisya.
Nasagip si Turerer ng mga mangingisda habang si Abdulla ay nailigtas ng isa pang mangingisda sa hiwalay na lokasyon.
Napinsala si Turerer ng first-degree burns sa hita at kanang braso habang si Abdulla ay walang kagalos-galos.
Dinala sa Jabez Medical Center sa Nasugbu at ngayon ay nasa mabuting kalagayan na.
Sa ulat, sinabing ang dalawang marinero ay nagsimulang maglayag sa bayan ng San Isidro sa Leyte patungong Ilocos Norte.
Gayonman, hindi binanggit kung sina Turerer at Abdulla ay mga turista.
