Convenience store nilooban Nagpanggap na empleyado tiklo

BAGO tuluyang nakalayo, mabilis na naaresto ng mga awtoridad ang isang lalaking nagpanggap na store clerk saka hinoldap ang isang convenience store sa bayan ng Calumpit, lalawiggan ng Bulacan, nitong Martes, 13 Hunyo.

Kinilala ni P/Col. Relly Arnedo, Provincial Director ng Bulacan PPO, ang suspek na si Ricardo Santiago, Jr., residente ng Brgy. San Jose, bayan ng Paombong, sa nabanggit na lalawigan Bulacan.

Nabatid na si Santiago rin ang pangunahing suspek sa panloloob ng isang convenience store sa Brgy. Iba O’ Este, sa bayan ng Calumpit.

Ayon sa ulat, nagpanggap ang suspek na store clerk at naka-uniporme pa na may pangalang Santiago Jr. nang pumasok sa nasabing tindahan at sapilitang pinabuksan sa crew ang vault.

Nagawang makulimbat ng suspek ang cash na may kabuuang halagang P99,455.00 mula sa vault at saka mabilis na tumakas palayo sa lugar.

Sa mabilis na pagkilos at pagtutulungan ng mga tauhan ng Calumpit MPS, Paombong MPS, at PIB Bulacan PPO na nagsagawa ng follow-up operations, matagumpay nadakip ang suspek na kasalukuyan nang nasa kustodiya na ng mga awtoridad. (MICKA BAUTISTA)