HATAW! D'yaryo ng Bayan hatawtabloid.com
SUGATAN ang isang 12-anyos batang lalaki nang mabaril ng kanyang 8-anyos kalaro gamit ang isang kalibre .45 pistol sa Brgy. Patalon, sa lungsod ng Zamboanga, nitong Huwebes, 8 Hunyo.
Ayon kay P/Lt. Col. Paul Andrew Cortes, Public Information Officer (PIO) ng Zamboanga CPS, tinamaan ng bala ng baril sa kanyang balikat ang biktima na hanggang ngayon ay tulala pa sa insidente.
Dagdag ni Cortes, pag-aari ang baril ng ama ng 8-anyos na bata na isang karpintero.
Haharapin ng ama ng bata, napaulat na wala sa kanilang bahay nang maganap ang insidente, ang kasong “negligence in relation to the child abuse law” at paglabag sa batas kaugnay sa ilegal na pag-iingat ng baril.
Dinala ang nakabaril na bata sa Zamboanga City Child Protection Center para sa nararapat na disposisyon habang nasa ligtas nang kalagayan ang 12-anyos biktima sa Labuan General Hospital, sa naturang lungsod.
