Sa Bulacan  
CJ GESMUNDO MANGUNGUNA SA ARAW NG KALAYAAN  

KASAMA si Supreme Court Chief Justice Alexander Gesmundo ang mga Bulakenyo sa komemorasyon ng Ika-125 Anibersaryo ng Proklamasyon ng Kalayaan ng Filipinas ngayong araw ng Lunes, 12 Hunyo, sa bakuran ng Simbahan ng Barasoain, sa lungsod ng Malolos.

Sa temang “Kalayaan. Kinabukasan. Kasaysayan.” magsisimula ang programa sa pagtataas ng watawat, Panunumpa ng Katapatan sa Watawat ng Filipinas, at pag-aalay ng bulaklak sa bantayog ni Hen. Emilio Aguinaldo na pangungunahan ng Punong Mahistrado kasama ang matataas na lokal na opisyal sa pangunguna ni Gobernador Daniel Fernando.

Kasabay ng pagdiriwang ng programa sa Bulacan ang pagdiriwang din ng Araw ng Kalayaan sa Rizal Park, Maynila, at Kawit, Cavite.

Samantala, kasabay ng paggunita ng Araw ng Kalayaan, magsasagawa ang pamahalaang panlalawigan ng Bulacan sa pamamagitan ng Provincial Youth, Sports, and Public Employment Service Office ng 2023 Kalayaan Job Fair sa Bulacan Capitol Gymnasium, sa parehong lungsod.

Sa pakikipagtulungan ng Department of Labor and Employment (DOLE) at ng Department of Migrant Workers (DMW), higit 9,000 bakanteng trabaho na magmumula sa 63 lokal na employer at 13 overseas na ahensiya ang maaaring aplayan ng mga Bulakenyong naghahanap ng trabaho.

Ayon kay Fernando, sa pamamagitan ng pagsasagawa ng mga job fair, magkakaroon ng maraming pagkakataon ang mga Bulakenyo na makakuha ng trabaho na magdadala sa kanila sa pagtupad ng kanilang mga pangarap para sa kanilang sarili at sa kanilang pamilya.

“Kasabay ng pagdiriwang ng Araw ng Kalayaan ay ating bibigyan ng pagkakataon ang ating mga kalalawigan na lumaya sa kahirapan sa pamamagitan ng paglalapit sa kanila ng libo-libong oportunidad sa paghahanapbuhay,” anang gobernador.

Dagdag dito, magkakaroon ng mini trade fair ang Department of Trade and Industry (DTI) traders at ang DOLE Integrated Livelihood Program.

Gayondin, ilang community service kabilang ang gupit at masahe, printing at photocopying ng mga dokumento ang iaalok nang libre sa pagdarausan ng gawain. (MICKA BAUTISTA)