HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
BALIK-PILIPINAS na pala si Liza Soberano. At ito ay ibinalita sa Showbiz Now Na nina Tita Cristy Fermin, Wendell Alvarez, at Romel Chika.
Karugtong na balita ng tatlong matitinik sa showbiz tsika, tila hindi raw alam ni Enrique Gil, ang sinasabing karelasyon ni Liza (hanggang ngayon kaya?) na nasa bansa na ang aktres.
Kaya kasunod nito ay ang pagkompirma nina Tita Cristy, Wendell, at Romel na hiwalay na ang LizQuen at isang araw ay ang dalawa mismo ang magkokompirma ng tunay na estado ng kanilang relasyon.
Noon pa mang nagpapahayag si Liza ng mga disgusto niya sa kanyang career, lumabas na ang balitang tila hindi na okey ang LizQuen dahil nga sa pananahimik ni Enrique.
Wala raw kasing say o reaksiyon man lang si Enrique sa mga nagaganap kay Liza.
Na ipinagtanggol naman ng dati nilang manager na si Ogie Diaz na sinabing sa pagkakaalam niya ay magkarelasyon pa rin ang dalawa. At kung hindi man nakikialam si Enrique ay baka mayroong usapan ang dalawa.
Ani Tita Cristy, “Isipin mo, dumating si Liza ng Pilipinas hindi alam ni Enrique? Hindi siya ang sumundo?”
Na sinagot naman ni Romel na baka sorpresahin ni Quen si Liza sa pagbabalik nito ng Pilipinas.
Pero iginiit ni Tita Cristy na hiwalay na ang dalawa at naghihintay na lang siya na isang araw ay lalaban ang katotohanang hiwalay na sina Liza at Enrique.
