Resbaker ng Gensan na si Lyka kampeon sa TNT

ITINANGHAL na bagong kampeon ng Tawag ng Tanghalan ng It’s Showtime si Lyka Estrella  matapos makuha ang pinakamataas na combined total scores mula sa mga hurado sa trending na Huling Tapatan.

Tinalo ng resbaker mula Gensan ang kapwa finalists na sina Nowi Alpuerto (95.1%) at Jezza Quiogue (89.6%) matapos makakuha ng total combined score na 98.9% .

Ani Lyka, “Kumapit na lang po ako sa Diyos na mabigyan ako ng lakas ng loob na lumaban pa kahit sobrang pagod na. Sobrang unexpected kasi lahat sila magagaling. Hindi ko po talaga inakala na from the start. Nagdasal na lang ako talaga kung will Niya ibigay.”

Nag-uwi si Lyka ng P1-M, bagong house and lot mula sa Camella, isang recording contract sa ilalim ng Star Music, management contract sa ilalim ng Polaris ng Star Magic, at isang Toym Imao trophy.

Naging mahigpit man ang labanan, nasungkit ng ginintuang tinig ni Lyka ang puso ng mga huradong na sina Gary Valenciano, Darren, Jona, Klarisse, Erik Santos, Nyoy Volante, Jolina Magdangal, Jed Madela, Marco Sison, at Louie Ocampo matapos niyang mapabilib ang mga ito sa kanyang medley ng mga kanta ni Jessie J.

Labis na kinapitan naman ng manonood ang nasabing tapatan kaya naman napunta ang hashtag nito na #TNT6AngHulingTapatan sa listahan ng Twitter trending topics worldwide.

Kahapon, Lunes, inabangan ang bagong bihis ng TNT na tinawag ng Tawag ng Tanghalan Duets na pares-pares ang laban at dalawang pangmalakasang boses ng mga Filipino ang bumida.

Napapanood ang It’s Showtime, 12NN mula Lunes hanggang Sabado sa A2Z, Kapamilya Channel,TV5, Kapamilya Online Live sa YouTube channel at Facebook page ng ABS-CBN Entertainment, gayundin sa iWantTFC app o iwanttfc.com.