Holidays tapos na
UVVRP CODING SCHEME EPEKTIBO MULI —MMDA

MULING ipinatupad ang number coding ng Metropolitan Manila Development Authority (MMDA) simula kahapon, Martes, 3 Enero 2023.

Pinaalalahanan ng MMDA ang mga motorista na muling ipinatutupad ang Expanded Unified Vehicular Volume Reduction Program (UVVRP) coding scheme simula kahapon matapos ang long weekend at holiday season.

Ayon sa MMDA sa ilalim nito, bawal bumiyahe ang mga sasakyan sa mga pangunahing lansangan sa Metro Manila batay sa huling digit ng kanilang plaka sa nasabing coding hours.

Ang mga plakang nagtatapos sa 1 at 2 ay sakop ng coding tuwing Lunes, 3 at 4 tuwing Martes, 5 at 6 tuwing Miyerkoles, 7 at 8 tuwing Huwebes at 9 at 0 tuwing Biyernes.

Exempted sa coding ang mga pampublikong sasakyan, transport network vehicles services (TNVS), motorsiklo, trak ng basura, marked government vehicle, trak ng petrolyo, marked vehicle ng media, truck ng bombero, ambulansiya, at sasakyang may dalang mga perishable  essential goods.

Magsisimula ang number coding, 7:00 am hanggang 10:00 am habang 5:00 pm at 8:00 pm mula Lunes hanggang Biyernes, maliban kung holiday. (GINA GARCIA)