Mag-asawang senior citizen, anak, kasabwat timbog sa ilegal na droga

APAT na hinihinalang drug personalities, kabilang ang mag-asawang senior citizens at ang kanilang anak ang naaresto sa isinagawang buy-bust operation ng pulisya sa Valenzuela City.

Kinilala ni Valenzuela City police chief P/Col. Salvador Destura, Jr., ang naarestong mga suspek na sina Virginia Abella, alyas Nanay, Arsenio Albesa,  kapwa 64 anyos; Jervy Albesa, alyas Tampe, 30, at Reynaldo Penano, 37, driver, pawang residente sa San Diego St., Brgy. Canumay West.

Sa ulat ni Col. Destura kay Northern Police District (NPD) Acting District Director P/Col. Ponce Rogelio Peñones, Jr., dakong 2:25 am nang magsagawa ang mga operatiba ng Station Drug Enforcement Unit (SDEU) sa pangunguna ni P/Lt. Joel Madregalejo ng buy-bust operation sa bahay ng mag-asawa sa Ruby Ville Subd., Brgy. Canumay West.

Kaagad inaresto ng mga operatiba ang mag-asawa matapos bentahan ng P300 halaga ng shabu ang isang pulis na nagsilbi bilang poseur buyer, kasama sina Jervy at Penano na kapwa nakuhaan ng hinihinalang shabu.

Ani P/Cpl. Pamela Joy Catalla, nakompiska sa mga suspek ang halos P10 gramo ng hinihinalang shabu, may standard drug price na P68,000, buy-bust money, P400 seized money, cellphone at hand bag.

Nahaharap ang mga suspek sa kasong paglabag sa RA 9165 o ang Comprehensive Dangerous Drug Act of 2002. (ROMMEL SALES)