May tama ng bala at nangangamoy na
EX-BATANGAS GOV., NATAGPUANG PATAY, SA KANYANG BAHAY

MAY tama ng bala at nangangamoy na nang matuklasan ng anak, pulis, at mga opisyal ng barangay ang walang buhay na katawan ni Richard “Ricky” Recto, 59 anyos, dating bise-gobernador ng lalawigan ng Batangas, nitong Lunes ng hapon, 5 Disyembre, sa lungsod ng Pasig.

Ayon sa ulat, humingi ng saklolo sa pamamagitan ng Viber si Raina Recto, dakong 5:00 pm kahapon sa Pasig CPS Sub-Station upang samahan silang pasukin ang silid ng kanyang ama.

Natuklasan ang bangkay ni Recto na nakaupo sa Lazyboy massage chair, may unan sa dibdib at hawak ang baril sa loob ng master bedroom dakong 6:00 pm sa ikalawang palapag ng kanilang bahay sa Valle Verde 6, Brgy. Ugong, sa nabanggit na lungsod.

Kapatid ang dating bise gobernador ng kasalukuyang House Deputy Speaker Ralph Recto at ng artistang si Marie Roxanne “Plinky” Recto.

Paniwala ng mga awtoridad, ilang araw nang walang buhay si Recto dahil nangangamoy na ang kanyang katawan.

Matatandaang inaresto si Recto noong nakaraang Hulyo matapos magsampa ng kasong Violence Against Women and Children ang kanyang dating kasintahan laban sa kanya. (EDWIN MORENO)