Lotlot ikinasiya nominasyon nila nina Boyet at Janine sa The EDDYS

RATED R
ni Rommel Gonzales

TUWANG-TUWA si Lotlot de Leon dahil tatlo silang magkakapamilya na nominado sa iisang award-giving body, ang The EDDYS ng SPEEd.

Kapwa nominee ni Lotlot ang daddy niyang si Christopher de Leon para sa pelikulang pinagsamahan nila, ang On The Job: The Missing 8 na nasa Best Supporting Actress category si Lotlot at si daddy Boyet naman niya ay kasama sa listahan ng mga nominee sa Best Supporting Actor.

At siyempre pa, proud mommy si Lotlot dahil nominado ang panganay niyang anak na si Janine Gutierrez bilang Best Actress para naman sa pelikulang Dito At Doon.

“Ang saya,” ang bulalas sa amin ni Lotlot nang makatsikahan namin. “‘Yung ma-nominate kaming tatlo, nakakataba na ng puso, isang malaking karangalan na para sa amin.”

Kung papipiliin siya, sino sa kanilang tatlo ang nais niyang manalo sa gabi ng parangal, ang daddy niya, siya o si Janine, o silang tatlo?

“Kung sino ang sa palagay ng mga hurado ang dapat manalo, roon tayo,” ang nakangiting wika ni Lotlot.

Ang The EDDYS ay mula sa samahan ng mga entertainment editor na SPEEd o Society of Philippine Entertainment Editors (kabilang ang entertainment editor nitong HATAW na si Maricris Valdez) at gaganapin ang kanilang awards night sa November 27 sa Metropolitan Theater (MET).