HATAW! D'yaryo ng Bayan hatawtabloid.com
NADAKIP ang isang 22-anyos estudyante na wanted sa kasong child abuse matapos maaresto sa isinagawang manhunt operation kaugnay ng SAFE NCRPO sa Malabon City, kamakalawa ng hapon.
Kinilala ni Malabon police chief, Col. Albert Barot ang naarestong suspek na si Chris Rey Villaviray, alyas Chen-Chen, 22 anyos, residene sa Block 10, Lot 5 Phase 3, E1, Pla-Pla St., Brgy. Longos.
Ayon kay Barot, alinsunod sa kampanya ng PNP laban sa mga wanted person, nagsagawa ang mga operatiba ng Warrant and Subpoena Section (WSS) ng Malabon police sa pangunguna ni P/CMSgt. Edwin Castillo sa ilalim ng pangangasiwa ni P/Maj. Patrick Alvarado, kasama ang Sub-Station 5 at 4th MFC RMFB-NCRPO ng joint manhunt operation kontra wanted persons na nagresulta sa pagkakaaresto sa akusado dakong 4:00 pm sa kanilang bahay.
Ani P/Maj. Alvarado, si Villaviray ay dinakip sa bisa ng warrant of arrest na inisyu noong 5 Oktubre 2022 ni Judge Catherine Therese Tagle-Salvador ng Regional Trial Court (RTC) Branch 73, Malabon City sa tatlong kaso ng paglabag sa Section 5(b) of RA 7610 (Special Protection of Children against Child Abuse, Exploitation and Discrimination Act.)
Piyansang P200,000 sa bawat bilang ang inirekomenda ng korte para sa kanyang pansamantalang kalayaan. (ROMMEL SALES)
