Mangingsidang tatay mahimbing na nakatulog  
SANGGOL NA ANAK NALUNOD SA ESTERO

NALUNOD ang siyam buwang gulang na sanggol na lalaki nang gumapang patungo sa sirang dingding ng kanilang bahay at nahulog sa estero sa Navotas City, kahapon ng umaga.

Natuklasan ang bangkay ng sanggol dakong 6:00 am nitong Martes, 25 Oktubre 2022 nang magising ang kanyang ama na wala na sa tabi ang bunsong anak na katabi niyang matulog, kasama ang dalawa pang batang anak, Lunes ng gabi.

Sa ulat ng pulisya, dakong 10:00 pm noong Lunes nang magkakatabing matulog ang tatlong bata at kanilang amang si Roel Galero, 29 anyos, mangingisda, sa kanilang tinutuluyang bahay sa F. Cruz St., Brgy. Tangos North.

Nang magising si Galero, wala na sa tabi nila ang sanggol kaya’t kaagad niyang hinanap ang anak hanggang matuklasan sa gilid ng sira nilang dingding na nakababad na sa tubig at wala nang malay.

Isinugod ni Galero sa Navotas City Hospital  (NCH) ang anak ngunit idineklara ng attending physician na patay na ang sanggol. (ROMMEL SALES)