Dennis aminadong ‘di akalaing mapapangasawa si Jen

MA at PA
ni Rommel Placente

SA guesting ni Dennis Trillo sa podcast ni Nelson Canlas na Updated with Nelson Canlas ay idinetalye niya ang mga pangyayari matapos ang hiwalayan nila ni Jennylyn Mercado ilang taon na ang nakararaan, pagkatapos ay nagkabalikan at ikinasal.

Kuwento ni Dennis, siya ang unang lumapit kay Jennylyn sa pamamagitan ng text habang siya’y may taping noon sa London para sa serye nila ni Tom Rodriguez sa GMA 7, ang My Husband’s Lover.

“Ako ‘yung nag-text. Siguro na-miss ko siya o ano. Tinext ko lang na, ‘O, kumusta ka na?’ Nag-reply naman siya tapos simula noon, nagtuloy-tuloy  na ulit ‘yung communication naming dalawa,” sabi ni Dennis.

Ayon pa sa aktor, tuwang-tuwa siya na nagkabalikan sila ni Jennylyn at hindi rin makapaniwala na mag-asawa na sila ngayon.

“‘Yun ‘yung nakatutuwa na nangyari ‘yung hindi mo akalain tapos ‘di mo alam, siya pa rin talaga hanggang sa huli.

“Pareho kami, never namin na-imagine na mangyayari ‘to sa mga buhay namin, na magkakaroon kami ng happy ending. Actually hindi pa happy ending, happy start,” patuloy pa niya.

Sa ngayon ay may isang anak na babae na sina Dennis at Jennylyn, si Dylan.