Estudyante minolestiya, kinunan ng video Guro dinakip sa Bulacan

INARESTO ng mga awtoridad ang isang guro matapos akusahan ng kanyang estudyante ng pangmomolestiya at pagbabanta sa lungsod ng San Jose del Monte, sa lalawigan ng Bulacan.

Sa ulat mula kay P/Col. Relly Arnedo, OIC ng Bulacan PPO, kinilala ang suspek na si Mark Matthew Calimlim, 29 anyos, high school teacher, at residente sa Sapang Palay, sa nabanggit na lungsod.

Ayon kay P/Lt. Col. Ronaldo Lumactod, hepe ng San Jose del Monte CPS, unang nag-alok ng ‘indecent proposal’ ang suspek sa 17-anyos na biktimang hindi pinangalanan at nagbantang ibabagsak ang grado kapag hindi pagbibigyan ang guro.

Kasunod nito, pinagsamantalahan umano ni Calimlim ang biktima sa isang bakanteng lote at kinunan ng video ang kanilang pagtatalik hanggang maulit sa isang hotel.

Nabatid na nagbanta ang suspek na ikakalat sa social media ang sex video nila kung hindi magpapadala ng hubad na larawan ang biktima.

Hindi nagpadala ang biktima sa pagbabanta ng suspek at nagsumbong sa mga awtoridad na nagresulta sa pagkakadakip kay Calimlim.

Kasalukuyan nang nakapiit ang suspek sa San Jose del Monte CPS custodial facility at nahaharap sa kasong Acts of Lasciviousness na nakatakdang isampa sa korte. (MICKA BAUTISTA)