Paborito si Mommy Caring

Marlon Bernardino September 13, 2022 Horse Racing, Other Sports, Sports

MARKADO sina Mommy Caring at Cam From Behind sa magaganap na 2022 PHILRACOM “Sampaguita Stakes Race” na aarangakada sa Metro Turf, Malvar – Tanauan City, Batangas ngayong araw ng Linggo.

May distansiyang 2,000 meter race, makakatagisan ng bilis nina Mommy Caring at Cam From Behind ang mga tigasing sina Doktora, Isla Puting Bato, O Sole Mio at La Liga Filipina.

Rerendahan ni former Philippine Sportswriters Association, (PSA) Jockey of the Year awardee Jessie Basilio Guce si Mommy Caring na pag-aari ni James Anthony Rabano habang si class A rider Kelvin Abobo ang gagabay kay Cam From Behind na pambato naman ni horse owner Melaine Habla.

Nakalaan ang garantisadong P2 milyong premyo na ikakalat sa unang apat na kabayong tatawid sa meta, kokobrahin ng mananalo ang P1.2 milyon sa event na suportado ng Philippine Racing Commission, (PHILRACOM) sa pamumuno ni chairman Reli de Leon.

Susungkitin ng second placer ang P450,000 habang tig P250,000 at P100,000 ang third at fourth ayon sa pagkakasunod sa karerang mga babaeng kabayo lamang ang makasasali.

Mag-uuwi rin ang breeder ng winning horse ng P100,000 habang P60,000 at P40,000 ang second at third.

Noong nakaraang taon, si Sky Shot ang nagwagi sa nasabing prestihiyosong karera.

Si Princess Eowyn naman ang nakapagtala ng back-to-back Sampaguita Stakes Race champion noong 2019 at 2020. (MARLON BERNARDINO)