HATAW! D'yaryo ng Bayan hatawtabloid.com
SUGATAN ang pito katao kabilang ang isang menor de edad nang pasabugan ng granada ang loob ng isang kainan sa lungsod ng Cotabato, lalawigan ng Maguindanao nitong Linggo ng gabi, 11 Setyembre.
Ayon kay P/Capt. Kenneth Rosales, kumakain ang mga biktima sa “Park and Dine Restobar” pasado 9:00 pm kamakalawa nang maganap ang pagsabog.
Aniya, patuloy ang kanilang imbestigasyon upang matukoy ang motibo sa krimen at tinitingnan na nila ang mga kuha sa CCTV.
Lumalabas sa paunang imbestigasyon na nagsimula ito sa pagtatalo ng ilang kostumer ng nasabing restobar.
Wala pang umaako sa pagpapsabog ngunit narekober ng pulisya ang ilang bahagi ng MK2 hand grenade, kabilang ang safety lever at fuse nito sa pinangyarihan ng krimen.
