Bawas presyo sa produktong petrolyo inabiso ng oil companies

NAG-ABISO ang mga kompanya ng langis sa pagbaba ng presyo ng kanilang mga produktong petrolyo ngayong Martes.

Pinangunahan ng Pilipinas Shell, Petron Corporation, Seaoil, PTT Philippines, Total Philippines, Unioil, Petro Gazz, at Phoenix Petroleum na magpapatupad sila ng bawas presyo na P0.45 kada litro ng gasolina, P1.45 kada litro ng diesel at P1.70 kada litro ng kerosene epektibo 6:00 am ngayong araw ng Martes.

Epektibo 12:01 am may bawas presyo rin sa kahalintulad na halaga ang kompanyang Caltex (CPI) habang ang kompanyang Cleanfuel ay epektibo 8:01 am.

Ang ipatutupad na bawas presyo ng mga produktong petrolyo ay bunsod sa patuloy na paggalaw ng presyo nito sa world market.

Ikinatuwa ng mga tsuper at motorista at hiniling na sana’y magtuloy-tuloy na  ang pagtapyas ng presyo ng mga produktong petrolyo.

Nitong nakaraang linggo, nagpatupad ng malakihang bawas presyo sa mga produktong petrolyo ang mga kompanya ng langis sa bansa na P2.60 kada litro ng gasolina, P1.55 kada litro ng diesel at P1.60 kada litro ng kerosene. (GINA GARCIA)